Ghazals of Allama Iqbal/allama iqbal ghazal in urdu/iqbal poetry in urdu text

غزل

 Ghazals of Allama Iqbal/allama iqbal ghazal in urdu/iqbal poetry in urdu text

 وہ حرف راز کہ مجھ کو سکھا گیا ہے جنوں 

خدا مجھے نفس جبرئیل دے تو کہوں 

ستارہ کیا مری تقدیر کی خبر دے گا 

وہ خود فراخی افلاک میں ہے خوار و زبوں 

حیات کیا ہے خیال و نظر کی مجذوبی 

خودی کی موت ہے اندیشہ ہائے گوناں گوں 

عجب مزہ ہے مجھے لذت خودی دے کر 

وہ چاہتے ہیں کہ میں اپنے آپ میں نہ رہوں 

ضمیر پاک و نگاہ بلند و مستئ شوق 

نہ مال و دولت قاروں نہ فکر افلاطوں 

سبق ملا ہے یہ معراج مصطفی سے مجھے 

کہ عالم بشریت کی زد میں ہے گردوں 

یہ کائنات ابھی ناتمام ہے شاید 

کہ آ رہی ہے دمادم صدائے کن فیکوں 

علاج آتش رومیؔ کے سوز میں ہے ترا 

تری خرد پہ ہے غالب فرنگیوں کا فسوں 

اسی کے فیض سے میری نگاہ ہے روشن 

اسی کے فیض سے میرے سبو میں ہے جیحوں